LUKHUZA ibuya uhlelo lomncintiswano wokuthungatha abanekhono lomculo, i-Idols SA, olugcine ukukhonjiswa eminyakeni emibili eyedlule, ngemuva kwamasizini awu-19 lukhonjiswa kumabonakude waseMzansi.
Ngokuthola kweLANGAÂ Lempelasonto, seziphothuliwe izingxoxo zokubuya kwalo lolu hlelo olususelwa kolwaphesheya kwezilwandle. Isivumelwano sesenziwe yinkampani yaseNingizimu Afrika eqopha izinhlelo zikamabonakude, iPrimedia Studios, ne-Opulant, eyengamele lezi zinhlelo phesheya kwezilwandle.
I-Primedia Studios, iyaziwa ngokukhiqiza izinhlelo ezisuselwa kwezaphesheya kwezilwandle, okubalwa kuzo iMaster Chef SA, iMy Kitchen Rules SA, iThe Masked Singer SA neDeal Or No Deal.
Leli phephandaba lithole nokuthi ezinye izinhlelo ezisemgodleni, ezikhuza ibuya ngaphansi kwayo iPrimedia Studios, yiThe Voice SA, neProject Runaway.
Nakuba sekuqinisekisiwe ukubuya kwalezi zinhlelo kumabonakude wakuleli, kodwa kakukacaci ngeziteshi ezizokhonjiswa kuzona, njengoba phambilini zazikhonjiswa kwezingaphansi kweMultiChoice. IPrimedia Studios inesivumelwano sokusebenzisana neSABC, njengoba izinhlelo zayo eziningi zikhonjiswa eziteshini ezingaphansi kwale nhlangano.
Kungenzeka lezi zinhlelo zikhonjiswe eziteshini zakwaSABC, noma kwiNetflix.
Okhulumela iPrimedia Studios, uLani Lombard, ukuqinisekisile ukusayinwa kwesivumelwano sokubuyisa lezi zinhlelo. Uthe sebewatholile amalungelo okuzikhiqiza, ngokubambisana nesihlabani seYellowstone, uDenim Richards. Uthe okwamanje kabakabi sesimweni sokudalula ukuthi lezi zinhlelo zizokhonjiswa kuziphi iziteshi.
“Sizokwazi uma sesibonisene neziteshi ezahlukene, saqala nezinhlelo zokuqopha,” kusho uLani.
Uveze ukuthi bazimisele ngokuxoxa neziteshi ezahlukene, okuzothi uma sebephothulile, benze isimemezelo. Kuzokhumbuleka ukuthi i-Idols SAÂ ike yaba nedumela kubabukeli bakuleli njengoba ikhiqize inqwaba yabaculi nosaziwayo.
Phakathi kwasebezakhele igama, abavundululwe yilolu hlelo, kubalwa uKhaya Mthethwa, u-Amanda Black, uMatema Moremi, uShekhinah, uKarabo Mogane, uSneziey Msomi, iQwabe Twins noLloyd.
